خو تصميمه بيته بو. نخأستی ای آخری شؤ هنده دعوا و جر و بحث ببی، امما بداری نبؤی. ايزه آرامش خأستی. امما مهتاب ونأشته.
- مو ندؤنم تو خودت فأمی چي كأري؟آخه 40 سال تي عمرˇ جي گوذره. چي خأيي او كيتابونˇ جي؟چیه فأرسِِي؟هنده دس وينگيري…
خودش دؤنسي اي زنأك چي كِشِره. حتا دؤنسي خو سوكوتˇ أمرأيم اونه آزار دأره امما نؤنسي چي بأ بكوني…
-اي هممه سال تأ بوتم لااقل ايته زأك كي مي ديل به اون خوش ببي.آخه مرد، مگه چي بخأستم تی جی؟ هينم پيله خواسته بو؟ همش او لعنتي اوتاقˇ مئن دري. آخ كي مره بوسوجأنِئی.
هر بار كه اي حرفه ايشتؤسي اونه گوتی: او حماقتي كي أمي پئر و مارؤن بگودده، بيه مون و تو نكونيم. اگه تی زأك می مورسن در بأيي چي؟اگه هيتو به تي حرف اي نفره بسوجني چي؟ امما مهتاب اي حرفونه نفأمسي. اونم ديگرؤنˇ مورسن خأستي مار ببي… امما اي مرتبه جواب فنده…
خوره چیی دكوده بشؤ اوتاقˇ مئن. خونه حال و هوا بدجور تيره و تار بو، ايزه اينه سرد بو. شايد بترسه ايسأ بو. امما نه. امشو هممه چي تمامأ بؤی. خو آخری وانیویسه دو مرتبه بخؤنده و بنأ ميزˇ سر، هالˇ مئن. مهتاب بشؤ بو بخوسی. هنده خؤنه در و ديواره نيگا بگوده. عروسي عكس، ديوارˇ سرˇ وارگده تابلؤن، مُبلی كه مهتابˇ سليقه بو و اونه خيلي دوس دأشتي، او قديمي ساعت… نه، امشؤ آخري شؤ بو.
بشؤ اوتاقˇ مئن و چيییه ويته بشؤ بالكنˇ سر. ايته لحظه فكر بگوده. از فرده مهتاب چي بأ بكوني؟ترديد… نه، امشؤ آخري شؤ بو. سو چار ته سيگار بكشه و خو چيییه تومؤنأ گوده.خأستي اي دفه ده مهتابه بديني.
دره آرام وازأ گوده. نوري كي لاي درˇ جي كم كمِي دكتي اوتاق مئن، اونه دس و پايه سوستأ گوده. خو بغضم مننسي فوكوني بيرون. خو انگشتؤنه بنأ مهتابˇ ميتالˇ سر و اونه چشمونه دوسته. لاحافه فكشه مهتابˇ سر. بنيشته ديواره تكيه بدأ و خو سيگاره روشنأ گوده.
آوریل 9, 2009 در t 8:08 ب.ظ
[...] گومأ بؤ أرسو، سيگارˇ دودˇ مئن/مهاجر معتمدي لشت نشايي/27 [...]