وانيويس

اگر ايته نيگا به وضعيت حال حاضر گيلؤن تؤدنيد شومونم أمي أمره هم عقيده بيد كي فكري بأ كودن و قدمي بأ ويتن. آشفتهˇ وضعˇ محيطˇ زيست، دأرونˇ واون جنگلونˇ جي، واگذاري أمي جنگلؤن به بخش خصوصي و ويلاسازي، اشغال كودن كاسپينˇ سواحل و ايشؤن ورجه بيكاري و اعتياد و فقر و … خالي قسمتي از أمي استانˇ مشكلات ايسه.
ايته قوم حفظه خو هويت و تاريخˇ وأسي چي بأ بوكوني؟ جلوگيري وأسي اي هممه خرابي جي كورا بأ بيشي؟ أمي خالي نهاد صدا و سيمايه كه اونم أمره هيتو ضربه زأره. هر چي مسخره ˇ آدمه أمي برنامونˇ مئن گيلكي حرف زنأ و داهاتˇ شينه و شيكپوش و با كلاسˇ آدمؤن فارسي گب زنأده.
اي وضعيت اسفبارˇ مئن أمي وظيفه چيسه؟ چه كاري أمي دسˇ جي برأيأ؟ اي اوضاع مئن تشكيل تشكل و نهادهاي مدني قانوني تونأ پور تأثير بأني. با اي كارˇ أمو هم اوشوني كي خأييدي تفرقه تودنيد أمي مئن شكست خورأده و هم أمو تونيم اتحاده بين أمي قومˇ مردوم حفظ بوكونيم. راجب تشكل هاي زيست محيطي اي نكته واجبه كي بيگيم تا زماني كه اوشؤن خوشؤنˇ اهدافه مردمˇ معيشت أمره گره نزند منند موفق ببأد. اگه اي كاره نوكوند هنده مردم خوشؤنˇ زمينونه غريبه آدمؤنˇ فروشد و دوباره هو آش و هو كاسه. در هر حال أمو اميدواريم بوتؤنيم تا جايي كه أمي دس فأرسه اي اطلاع رسانيه انجام بدأنيم.انقد گرفتاري استانˇ شين زياد بو كه يادأ شو راجب ماري زبؤن جهاني روز حرف بزنيم. البته اونقدر مطلب نأيه نشريه مئن كي أمي حرفه بزنه. به مناسبت اي روزم اي شوماره حدودا نود درصدˇ أمي مطالب گيلكيه. اين شومو گيلكؤن اينم زيته دهم.