می «إیجگرأ» «اوجأ» بدی/میرعماد م. موسوی

فقط آسمؤن نئه، فقط زمین نئه
فقط وارؤن و ورف ˇ موچچی نئه،
فقط ورفˇ پوشتˇسر، کرچˇ افتؤ نئه..
فقط شی بزئه شیشه نئه..
فقط «رعنا»ی نئه، فقط «هیبت» نئه.. فقط «آی لیلی» نئه.. فقط «شلمؤنˇ لأکؤی» نئه
فقط «بنفشه گول» نئه .. فقط «چقد جنگلأ خوسی» نئه
فقط «عروسˇ گولی» نئه .. فقط «می جؤنˇ زن مأر» نئه
فقط گالپشی خؤنه نئه.. فقط سوفال سر نئه
فقط چوغال گل نئه.. فقط بیجارکاری و چأیی چینی نئه، فقط کج وأچینی نئه.
«الأ تی تی »أم ایسه، «جومأ بازار»أم ایسه..
« بیا مرأ یاری بدن»أم ایسه..«زأکی جان»أم ایسه.
فقط اسبˇ ارأبه نئه.. ماشینأم ایسه.
فقط اوشؤن نبون، فقط مو نئم.. تنأم ایسی.

هردفأ خأنم بنویسم، ایسه هرچی وأسه ببون، هروخت ببون، بخألئه یکچی می گولئه دخشارده دره
مننئم آدمˇ مورسؤن بنویسم.. مننئم راحت گب بزنم..
خیلی چیزؤن مأ اذئت کؤنه و نوگذأنه آرؤم بیسم..
خیلی زمت بوگذشته، اممأ بخألئه او سورخئن تازهٰ ن .. أله تیر و تفنگˇ صدا هنه..
بخألئه أله خون کالسه دره.. سیفید ورفˇسر، نم بیته خاکˇسر، سیا اسفالتˇ سر..
مننئم او مرداکؤنه فراموشأ کونم. اوشؤنی کی خوشؤنˇخونˇ همرأ زمینه سورخأ گودن.
یا اوشؤنی کی ایشؤنˇ خون، زمینه سورخأ نوده، اممأ خوشؤنˇ مردومˇ به زحمت بکشئن..
اوشؤنی کی هرکه سلام بوته، علیک بیتن.
مأ یادأ نشنه کی کئن ایسأبون و أله ایسأن. کئنأم ایسأبون و دئه نیسأن!
ای همه یی گب بزئم، شاید خأسم می بنویشته هأچی یکته تومار نبون،
کی فقط چنته اسم اونه مئن دره..
خأسم و خأنم بوگؤم کی امه گب، امه کار.. فقط اوشؤنی کی اوّل بوتم نئه.

فقط سبزˇزمین نئه.. سیا اسفالتأم ایسه، سمنتی پیاده روأم ایسه.
فقط ترانه و شعر و داستؤن نئه..
زندگی ئم ایسه.

1) او کلمه‌ٰنی گه عنوانˇ مئن، گیومه دورون بنویشته ببؤن، دوتته مجموعه شئرˇ اسمه.
2) او کلمه‌ٰنی گه متنˇ مئن، گیومه دورون بنویشته ببؤن، گیلکی ترانه‌ٰنأ جی ایسسن.