سارا ثابت
21 فوريه و «روز جهاني زبان مادری» يه پوشت سر بناييم . نانم شوما کويته دسته شين ايسيد؟ اوشانی کی گيلکی گب زنيد و حاضر نييد حتی به احترام خوشان موخاطب ايبچه کوتاه باييد ، يا اوشانی کی خوشان مار زبانا جيگا ديهيد، و يا او پيله گوروهی کی گا گيلکی و گلف فارسی گب زنيد؟
فارسيه گيلکی لهجه امره گب زئن خنده داره ؟ گيلکيه فارسی لهجه امره گوفتن چه طو؟
جايی بخوانده بوم « مودرن ، کسيه کی بتانه خودش خو مليّته انتخاب بوکونه » شيمی نظر چيسه؟
مره، کی گيلکيه به عونوان دومی زبان ياد گيفتن درم، پور جای سؤال بو کی اگر کسی اَنقده خو هويت و زبان جا فاصله بيگيره که ايته تازه هويت بيافه ، اون تکليف چيسه؟ آيا گوذشته پيگيری کودن ، پسا شوئن معنيه نده؟ بعدان بيدم اَ فرد نيگا، ويژگيانی دره کی دور بوستن جی « سنت» ايته جی اونه پيله شاخصه يانه .
اگر بخوام می حرفه رُک بزنم وا بگم ، امانی کی گيلکيه به عونوان دومی زبان دونبال کونيم ، ويشتر زبان و هويت موضوع امره درگيريم. امان بدون تعصب، و انديشه امره زبانه غما خوريم.
اما خودمان زبانه بخترين ، و گيلان و گيلانيه پيله ترين نشناسيم و دانيم کی قومی ايسيم ، ديگر اقوام ِ ورجا. و ويژگيانی دَريم کی وا حفظ ببيد ، چون وجود دَريد . و اَ وجود دَشتن هيچ حقيه کسی جا ضايع نوکونه.گيلک و اون خصوصيتان هو اندازه امره زيبا و قابل تقديره کی قوم« کاناک» و اون فرهنگ ،کی استراليا جزاير شين ايسه.
امان مايليم گيلک طفل ، حق بداره خو زبانه ياد بيگيره تا وقتی پيلا بوست اون امره «بيگانه » نبه.
امان مايليم گيلکی زبان به رسميت شناخته ببه و کلمه « گويش» اون کنار جا پاکا به.
